అర్జీదారుల పట్ల సానుభూతితో వ్యవహరించాలి..
వృద్ధులు, మహిళలపై ప్రత్యేక శ్రద్ధ చూపాలి..
పోలీసు అధికారులకు అన్నమయ్య జిల్లా ఎస్పీ ధీరజ్ కునుబిల్లి ఆదేశాలు..
జిల్లా పోలీసు కార్యాలయంలో ప్రజా సమస్యల పరిష్కార వేదిక కార్యక్రమం..
మదనపల్లె ముచ్చట్లు:
ప్రజల సమస్యలను విని, వాటికి తక్షణ పరిష్కారం చూపించడమే పోలీస్ వ్యవస్థ యొక్క అత్యంత ప్రధానమైన బాధ్యత అని అన్నమయ్య జిల్లా ఎస్పీ ధీరజ్ కునుబిల్లి స్పష్టం చేశారు. బాధితులకు న్యాయం అందించడంలో ఎలాంటి జాప్యం లేకుండా చూడాలని ఆయన అధికారులను ఆదేశించారు. సోమవారం మదనపల్లెలోని జిల్లా పోలీసు ప్రధాన కార్యాలయంలో నిర్వహించిన ‘ప్రజా సమస్యల పరిష్కార వేదిక’ కార్యక్రమంలో ఎస్పీ స్వయంగా పాల్గొని ప్రజల నుంచి అర్జీలు స్వీకరించారు.
సుదూర ప్రాంతాల నుంచి వచ్చిన బాధితులతో ఆయన ముఖాముఖిగా మాట్లాడి, వారి ఇబ్బందులను సావధానంగా అడిగి తెలుసుకున్నారు. అనంతరం సంబంధిత పోలీసు అధికారులతో ఫోన్లో మాట్లాడి సమస్యల సత్వర పరిష్కారానికి ఆదేశాలు జారీ చేశారు.
ప్రత్యేక శ్రద్ధ అవసరం
ఈ సందర్భంగా ఎస్పీ మాట్లాడుతూ.. తమ సమస్యలను అధికారులకు విన్నవించుకునే హక్కు ప్రతి పౌరుడికీ ఉందన్నారు. ముఖ్యంగా వృద్ధులు, దివ్యాంగులు, మహిళలు వంటి సున్నితమైన వర్గాల వారు ఫిర్యాదు చేయడానికి వచ్చినప్పుడు పోలీసులు వారి పట్ల ప్రత్యేక శ్రద్ధ కనబరచాలని, వారితో మర్యాదపూర్వకంగా వ్యవహరించాలని సూచించారు. స్వీకరించిన ప్రతి ఫిర్యాదుపై తక్షణమే స్పందించి, నిర్ణీత గడువులోగా చట్టపరమైన పరిష్కారం చూపాలని అధికారులకు స్పష్టమైన ఆదేశాలు ఇచ్చారు.
భయపడకుండా పోలీసుల వద్దకు రండి.. ప్రజలు తమకు ఎదురయ్యే నేరాలు, వేధింపులు, తీవ్రమైన కుటుంబ సమస్యలు లేదా ఇతర ఇబ్బందులపై ఫిర్యాదు చేసేందుకు ఎలాంటి భయం, సంకోచం లేకుండా పోలీసుల వద్దకు రావాలని ఎస్పీ సూచించారు. వయసు పైబడిన వారు, దూరభారం వల్ల జిల్లా కేంద్రానికి రాలేని వారు.. నేరుగా తమ సమీపంలోని పోలీస్ స్టేషన్, సర్కిల్ లేదా సబ్ డివిజన్ కార్యాలయాల్లో కూడా తమ అర్జీలు సమర్పించవచ్చని ఆయన తెలిపారు.
Tags:Our goal is swift justice for the victims.
