మురసు తుఫాను నష్టాలపై సమగ్ర నివేదికలు సిద్ధం చేయాలి

అమరావతిముచ్చట్లు:

ఈ నెల 14న జిల్లాలో కేంద్ర బృందం క్షేత్రస్థాయి పర్యటన – జిల్లా కలెక్టర్ కృతిక శుక్ల

మురసు తుఫాను ప్రభావంతో జిల్లాలో వివిధ రంగాలకు వాటిల్లిన నష్టాలను క్షేత్రస్థాయిలో పరిశీలించేందుకు ఈ నెల 14వ తేదీన కేంద్ర బృందం జిల్లాలో పర్యటించనున్న నేపథ్యంలో, సంబంధిత శాఖల అధికారులు పూర్తి స్థాయి సమాచారంతో, సమగ్ర నివేదికలతో సిద్ధంగా ఉండాలని జిల్లా కలెక్టర్ కృతిక శుక్ల ఆదేశించారు.
ఈ సందర్భంగా జిల్లా కలెక్టర్ సంబంధిత శాఖల అధికారులతో వీడియో కాన్ఫరెన్స్ నిర్వహించి, తుఫాను కారణంగా జిల్లాలో జరిగిన నష్టాలు, చేపట్టిన సహాయక చర్యలు, పునరుద్ధరణ పనులు, నష్టాల అంచనా నివేదికలపై సమీక్ష నిర్వహించారు.
ఈ సందర్భంగా జిల్లా కలెక్టర్ మాట్లాడుతూ, కేంద్ర బృందం పర్యటనను దృష్టిలో ఉంచుకుని ప్రతి శాఖ తమ పరిధిలో జరిగిన నష్టాలను క్షేత్రస్థాయిలో క్షుణ్ణంగా పరిశీలించి, వాస్తవ పరిస్థితులకు అనుగుణంగా నివేదికలు సిద్ధం చేయాలని సూచించారు. నష్టాలకు సంబంధించిన వివరాలను కేవలం గణాంకాలకే పరిమితం చేయకుండా, క్షేత్రస్థాయి పరిశీలన ఆధారంగా స్పష్టమైన ఆధారాలతో రూపొందించాలని తెలిపారు.
వ్యవసాయ, అనుబంధ రంగాల నష్టాలపై ప్రత్యేక దృష్టి
వ్యవసాయ శాఖ, ఉద్యానవన శాఖ, పశుసంవర్ధక శాఖ, మత్స్యశాఖ తదితర అనుబంధ శాఖల అధికారులు తుఫాను ప్రభావంతో పంటలకు జరిగిన నష్టం, నీట మునిగిన పంటల విస్తీర్ణం, దెబ్బతిన్న ఉద్యాన పంటలు, పశుసంపదకు జరిగిన నష్టం, మత్స్య రంగానికి కలిగిన నష్టాలను సమగ్రంగా నమోదు చేయాలని ఆదేశించారు. ప్రభావిత రైతుల వివరాలు, గ్రామాల వారీగా నష్టాల అంచనాలు, పంటల వారీగా నష్టపోయిన విస్తీర్ణం తదితర వివరాలతో నివేదికలు సిద్ధం చేయాలని సూచించారు.
విద్యుత్ శాఖ
తుఫాను ప్రభావంతో దెబ్బతిన్న విద్యుత్ స్తంభాలు, ట్రాన్స్‌ఫార్మర్లు, విద్యుత్ లైన్లు, ఇతర మౌలిక సదుపాయాల వివరాలను సమర్పించాలని విద్యుత్ శాఖ అధికారులను ఆదేశించారు. విద్యుత్ సరఫరాలో ఏర్పడిన అంతరాయాలు, చేపట్టిన మరమ్మతు పనులు, పునరుద్ధరణకు చేసిన ఖర్చు తదితర అంశాలను నివేదికలో పొందుపరచాలని తెలిపారు.
గ్రామీణ నీటి సరఫరా శాఖ
గ్రామీణ ప్రాంతాల్లో తాగునీటి సరఫరా వ్యవస్థకు జరిగిన నష్టాలు, దెబ్బతిన్న పైపులైన్లు, నీటి సరఫరా పథకాలు, పంపింగ్ వ్యవస్థలు తదితర వివరాలను సేకరించి, చేపట్టిన మరమ్మతులు, పునరుద్ధరణ చర్యలతో కూడిన నివేదికను సిద్ధం చేయాలని సూచించారు. ప్రజలకు తాగునీటి సరఫరాలో ఎలాంటి ఇబ్బందులు తలెత్తకుండా అవసరమైన చర్యలు తీసుకోవాలన్నారు.
గృహ నిర్మాణ శాఖ
తుఫాను కారణంగా దెబ్బతిన్న ఇళ్ల వివరాలను గ్రామాల వారీగా సేకరించి, పూర్తిగా దెబ్బతిన్న గృహాలు, పాక్షికంగా దెబ్బతిన్న గృహాల వివరాలను వేర్వేరుగా నమోదు చేయాలని గృహ నిర్మాణ శాఖ అధికారులను ఆదేశించారు. నష్టాల అంచనాతో పాటు బాధిత కుటుంబాల వివరాలు, చేపట్టిన సహాయక చర్యలను నివేదికలో పొందుపరచాలని తెలిపారు.
ఇతర శాఖల నివేదికలు
తుఫాను ప్రభావంతో రహదారులు, డ్రైనేజీలు, ప్రభుత్వ భవనాలు, ఇతర ప్రజా మౌలిక సదుపాయాలకు జరిగిన నష్టాలను సంబంధిత శాఖల అధికారులు గుర్తించి, వాటి పునరుద్ధరణకు అవసరమైన చర్యలు, అంచనా వ్యయంతో కూడిన వివరాలను సిద్ధం చేయాలని జిల్లా కలెక్టర్ సూచించారు.
కేంద్ర బృందం పర్యటన సందర్భంగా సంబంధిత అధికారులు తమ శాఖలకు సంబంధించిన పూర్తి సమాచారంతో అందుబాటులో ఉండాలని, క్షేత్రస్థాయి పరిశీలనకు అవసరమైన ఏర్పాట్లు సమన్వయంతో చేపట్టాలని తెలిపారు. కేంద్ర బృందం అడిగే ప్రతి అంశానికి వాస్తవాధారిత సమాచారం అందించేలా అధికారులు ముందస్తు సన్నద్ధతతో ఉండాలని స్పష్టం చేశారు.
నష్టాల అంచనాలో పారదర్శకత, ఖచ్చితత్వం పాటించాలని, ఏ ఒక్క ప్రభావిత ప్రాంతం లేదా బాధిత కుటుంబానికి సంబంధించిన వివరాలు నమోదు కాకుండా మిగిలిపోకూడదని కలెక్టర్ అధికారులకు స్పష్టం చేశారు. అన్ని శాఖలు పరస్పర సమన్వయంతో పనిచేసి, నిర్ణీత సమయంలో సమగ్ర నివేదికలను సమర్పించాలని ఆదేశించారు.

Tags:Comprehensive reports on the damages caused by Cyclone Murasu must be prepared.