- తిరుమలలో నిరంతర నిఘాలో భాగంగా వ్యక్తిని గుర్తించిన పోలీసులు.
- విచారణలో 15 రోజులుగా ఇంటికి దూరంగా ఉన్నట్లు గుర్తింపు.
- కుటుంబ సభ్యులకు వెంటనే సమాచారం అందించిన క్రైమ్ పోలీసులు.
- తిరుపతికి వచ్చిన కుమారుడికి సురక్షితంగా అప్పగింత.
తిరుపతి ముచ్చట్లు:
తిరుపతి జిల్లా ఎస్పీ ఎల్. సుబ్బరాయుడు ఆదేశాల మేరకు తిరుమలలో భక్తుల భద్రతతో పాటు తప్పిపోయిన, కుటుంబ సభ్యులకు దూరమైన వ్యక్తులను గుర్తించి వారి కుటుంబాలకు చేర్చే దిశగా పోలీసులు నిరంతరం అప్రమత్తంగా విధులు నిర్వహిస్తున్నారు. ఈ క్రమంలో తిరుమలకు వచ్చిన ఒక వ్యక్తిని పోలీసులు గుర్తించి, సమగ్రంగా విచారించి, అతని కుటుంబ సభ్యుల వివరాలను సేకరించి సురక్షితంగా కుటుంబ సభ్యులకు అప్పగించారు.
బాపట్ల జిల్లా, చీరాల మండలం, ఎపురుపాలెం గ్రామానికి చెందిన వెంగల వెంకటేశ్వరరావు (61) కుటుంబ సభ్యులతో గొడవల నేపథ్యంలో సుమారు 15 రోజుల క్రితం ఎవరికీ సమాచారం ఇవ్వకుండా ఇంటి నుంచి వెళ్లిపోయారు. అనంతరం వివిధ ప్రాంతాల్లో తిరుగుతూ 19-09-2026న తిరుమలకు చేరుకున్నారు. అక్కడ విధుల్లో ఉన్న పోలీసులు నిఘాలో భాగంగా ఆయనను గుర్తించి వివరాలు తెలుసుకున్నారు.
తదుపరి విచారణ నిమిత్తం వెంకటేశ్వరరావును తిరుపతి క్రైమ్ పోలీస్ స్టేషన్కు తరలించగా, క్రైమ్ ఇన్స్పెక్టర్ ఎన్. శివకుమార్ విచారించారు. విచారణలో ఆయన సుమారు 15 రోజులుగా కుటుంబ సభ్యులకు దూరంగా ఉన్నట్లు వెల్లడైంది. దీంతో పోలీసులు ఆయన కుటుంబ సభ్యులను సంప్రదించి, విషయం తెలియజేశారు.
సమాచారం అందుకున్న ఆయన కుమారుడు నాగేంద్రకుమార్ 20-09-2026న తిరుపతికి చేరుకున్నారు. కుటుంబ సభ్యుల వివరాలను నిర్ధారించిన అనంతరం వెంకటేశ్వరరావును ఆయన కుమారుడికి సురక్షితంగా అప్పగించారు. చాలాకాలం తర్వాత కుటుంబ సభ్యులు కలుసుకోవడంతో వారు పోలీసులకు కృతజ్ఞతలు తెలిపారు.
తిరుమలకు వచ్చే ప్రతి భక్తుడి భద్రతకు ప్రాధాన్యతనిస్తూ, అనుమానాస్పద పరిస్థితుల్లో కనిపించే వ్యక్తుల వివరాలను తెలుసుకోవడంతో పాటు, కుటుంబ సభ్యులకు దూరమైన వ్యక్తులను గుర్తించి వారిని సురక్షితంగా కుటుంబాలకు చేర్చేందుకు తిరుపతి జిల్లా పోలీసులు నిరంతరం అప్రమత్తంగా విధులు నిర్వహిస్తున్నారని అధికారులు తెలిపారు.
Tags: Tirupati police identified a person who had become separated from their family and safely handed them over to their family members.
