తిరుపతి ముచ్చట్లు:
- ▪️
- ▪️ “డ్రగ్స్ వద్దు బ్రో” నినాదంతో యువతలో చైతన్యం.
- ▪️ మాదక ద్రవ్యాల సమాచారానికి EAGLE టోల్ ఫ్రీ నంబర్ – 1972.
- ▪️ డ్రగ్స్ సరఫరాదారులపై కఠిన చర్యలు – బాధితులకు పునరావాసం.
- ▪️ BIO-Check కిట్లతో వేగవంతమైన పరీక్షలు – ప్రజల భాగస్వామ్యంతో నిర్మూలనకు నాంది.
- గంజాయి రహిత తిరుపతి జిల్లానే లక్ష్యం – ప్రజల భాగస్వామ్యంతో మాదక ద్రవ్యాల నిర్మూలనకు ప్రత్యేక అవగాహన కార్యక్రమం.
తిరుపతి జిల్లా పోలీస్ శాఖ గంజాయి, డ్రగ్స్ మరియు ఇతర మాదక ద్రవ్యాల నిర్మూలనకు యుద్ధ ప్రాతిపదికన చర్యలు చేపడుతోంది. జిల్లా ఎస్పీ ఎల్. సుబ్బారాయుడు, ఆదేశాల మేరకు, అదనపు ఎస్పీ ఏ. శ్రీనివాసులు పర్యవేక్షణలో, రేణిగుంట డీఎస్పీ వై. శ్రీనివాసరావు ఆధ్వర్యంలో, రేణిగుంట సీఐ జయచంద్ర నాయకత్వంలో ఎస్సై శ్రీనివాసరావు మరియు పోలీసు సిబ్బంది కరకంబాడి పంచాయతీ పరిధిలోని తారకరామనగర్లో భారీ స్థాయిలో మాదక ద్రవ్యాల నిర్మూలనపై ప్రత్యేక అవగాహన కార్యక్రమాన్ని నిర్వహించారు.
ఈ సందర్భంగా అధికారులు మాట్లాడుతూ, యువత భవిష్యత్తును దెబ్బతీసే గంజాయి, డ్రగ్స్ మరియు ఇతర మత్తు పదార్థాలపై తిరుపతి జిల్లా పోలీసులు ఎలాంటి రాజీ లేకుండా కఠిన చర్యలు తీసుకుంటున్నారని తెలిపారు. యువతను మత్తు వ్యసనాల బారిన పడకుండా కాపాడడం, కుటుంబాలను రక్షించడం, ఆరోగ్యవంతమైన సమాజ నిర్మాణమే ఈ కార్యక్రమాల ప్రధాన లక్ష్యమని పేర్కొన్నారు.
- “మత్తుకు దూరం… ఆరోగ్యంగా ఉందాం”
కార్యక్రమంలో పాల్గొన్న యువత, విద్యార్థులు, మహిళలు మరియు స్థానిక ప్రజలకు మత్తు పదార్థాల వల్ల కలిగే శారీరక, మానసిక, ఆర్థిక, సామాజిక దుష్పరిణామాలపై అవగాహన కల్పించారు. “డ్రగ్స్ వద్దు బ్రో” అనే నినాదంతో యువతలో చైతన్యం తీసుకువస్తూ, ఆరోగ్యకరమైన జీవన విధానాన్ని అలవరచుకోవాలని సూచించారు.
- EAGLE వ్యవస్థ – ప్రజలకు భరోసా.
మాదక ద్రవ్యాల నిర్మూలన కోసం రాష్ట్ర ప్రభుత్వం ఏర్పాటు చేసిన ఎలైట్ యాంటీ నార్కోటిక్స్ గ్రూప్ ఫర్ లా ఎన్ఫోర్స్మెంట్ (EAGLE) గురించి ప్రజలకు వివరించారు. గంజాయి, డ్రగ్స్ విక్రయాలు లేదా వినియోగానికి సంబంధించిన సమాచారం తెలిసిన వారు టోల్ ఫ్రీ నంబర్ 1972కు ఫోన్ చేసి సమాచారం అందించాలని కోరారు. సమాచారం అందించిన వారి వివరాలను పూర్తిగా గోప్యంగా ఉంచడంతో పాటు, వారికి తగిన రక్షణ కల్పిస్తామని హామీ ఇచ్చారు.
- అవగాహనతో పాటు కార్యాచరణ.
కేవలం అవగాహన కల్పించడమే కాకుండా, మత్తు పదార్థాల వినియోగదారులను గుర్తించి వారిని తిరిగి సాధారణ జీవితంలోకి తీసుకురావడానికి ప్రత్యేక కార్యాచరణ ప్రణాళికను అమలు చేస్తున్నట్లు అధికారులు తెలిపారు. మత్తు పదార్థాలకు బానిస కావద్దని, అవసరమైతే స్వచ్ఛందంగా పరీక్షలు చేయించుకుని విముక్తి పొందాలని ప్రజలకు పిలుపునిచ్చారు.
- BIO-Check కిట్లతో వేగవంతమైన పరీక్షలు.
మత్తు పదార్థాల వినియోగాన్ని త్వరితగతిన గుర్తించేందుకు BIO-Check వంటి ఆధునిక స్క్రీనింగ్ కిట్లను వినియోగిస్తున్నట్లు తెలిపారు. ఈ పరీక్షల ద్వారా డ్రగ్స్ వినియోగదారులను వేగంగా, కచ్చితంగా గుర్తించే అవకాశం ఉందని పేర్కొన్నారు.
- సరఫరాదారులపై ఉక్కుపాదం.
డ్రగ్స్ పరీక్షల్లో పాజిటివ్గా నిర్ధారణ అయిన వ్యక్తుల ద్వారా మాదక ద్రవ్యాల సరఫరా వ్యవస్థను గుర్తించి, వాటి వెనుక ఉన్న సరఫరాదారులు, మధ్యవర్తులు, విక్రేతలపై కఠిన చట్టపరమైన చర్యలు తీసుకుంటామని హెచ్చరించారు. గంజాయి మరియు మాదక ద్రవ్యాల అక్రమ రవాణాను పూర్తిగా అరికట్టేందుకు ప్రత్యేక నిఘా కొనసాగుతోందని వెల్లడించారు.
- పునరావాసం – కొత్త జీవితానికి మార్గం.
మత్తు పదార్థాలకు బానిసలైన వారిని శిక్షించడం మాత్రమే కాకుండా, వారిని తిరిగి సాధారణ జీవితంలోకి తీసుకురావడంపై కూడా పోలీసులు ప్రత్యేక దృష్టి సారిస్తున్నారు. గుర్తించిన బాధితులను డీ-అడిక్షన్, రీహాబిలిటేషన్ కేంద్రాలకు తరలించి, అవసరమైన వైద్య చికిత్స, మానసిక కౌన్సెలింగ్ మరియు పునరావాస సేవలు అందిస్తున్నారు.
చికిత్స అనంతరం బాధితులను కుటుంబ సభ్యులతో తిరిగి అనుసంధానం చేసి, వారు సమాజంలో గౌరవప్రదమైన జీవితం గడిపేలా చర్యలు చేపడుతున్నారు. యువత మత్తు పదార్థాలకు దూరంగా ఉండి విద్య, ఉపాధి, వ్యక్తిత్వ వికాసంపై దృష్టి సారించాలని అధికారులు సూచించారు.
జిల్లా ఎస్పీ ఎల్. సుబ్బారాయుడు, సందేశం ఇస్తూ
“గంజాయి, డ్రగ్స్ వంటి మాదక ద్రవ్యాలు వ్యక్తుల జీవితాలను మాత్రమే కాకుండా కుటుంబాలను, సమాజాన్ని కూడా తీవ్రంగా ప్రభావితం చేస్తాయి.
తిరుపతి జిల్లాను గంజాయి రహిత జిల్లాగా తీర్చిదిద్దడం మా లక్ష్యం. మాదక ద్రవ్యాల సరఫరా, రవాణా, విక్రయాల్లో పాల్గొనే వారిపై కఠిన చట్టపరమైన చర్యలు తప్పవు. యువత తమ భవిష్యత్తును నాశనం చేసుకునే వ్యసనాలకు దూరంగా ఉండాలి. ప్రజలు, తల్లిదండ్రులు, విద్యాసంస్థలు, స్వచ్ఛంద సంస్థలు పోలీసులకు సహకరించి మాదక ద్రవ్యాల నిర్మూలనలో భాగస్వాములు కావాలి. అనుమానాస్పద సమాచారం తెలిసిన వెంటనే 1972 టోల్ ఫ్రీ నంబర్కు సమాచారం అందించండి. సమాచారం ఇచ్చిన వారి వివరాలు పూర్తిగా గోప్యంగా ఉంచబడతాయి.”
చివరిగా, “మత్తును వదిలిద్దాం – ఆరోగ్యవంతమైన సమాజాన్ని నిర్మిద్దాం”, “డ్రగ్స్ వద్దు బ్రో” అనే నినాదాలతో ప్రజలు, యువత, తల్లిదండ్రులు పోలీసులకు సహకరించాలని అధికారులు విజ్ఞప్తి చేశారు.
Tags:Police conduct extensive awareness programs with the goal of making Tirupati district cannabis-free.
