విజయవంతంగా ‘SP-SAMPARK’
పోలీస్ సిబ్బంది సమస్యల పరిష్కారానికి వినూత్న వేదిక
నేరుగా ఫోన్ లైన్ ద్వారా సమస్యలు ఆలకించిన అదనపు ఎస్పీ ఎల్.మోహన రావు
అనకాపల్లి ముచ్చట్లు:
జిల్లా పోలీసు శాఖలో పనిచేస్తున్న సిబ్బంది సంక్షేమానికి పెద్దపీట వేస్తూ, జిల్లా ఎస్పీ తుహిన్ సిన్హా, ఆదేశాల మేరకు ‘SP-SAMPARK’ ఫోన్-ఇన్ కార్యక్రమం జిల్లా పోలీసు కార్యాలయంలో విజయవంతంగా కొనసాగుతోంది. ఇందులో భాగంగా జిల్లా అదనపు ఎస్పీ ఎల్.మోహన రావు స్వయంగా ఫోన్ లైన్ ద్వారా క్షేత్రస్థాయి సిబ్బంది సమస్యలను ఆలకించి, వాటి పరిష్కారానికి తక్షణ చర్యలు చేపట్టారు.ఉన్నతాధికారులకు మరియు క్షేత్రస్థాయి సిబ్బందికి మధ్య ఉన్న దూరాన్ని తగ్గించి, సిబ్బంది తమ వ్యక్తిగత లేదా వృత్తిపరమైన ఇబ్బందులను ఎటువంటి సంకోచం లేకుండా పంచుకునేందుకు ఈ వేదికను రూపొందించారు.జిల్లావ్యాప్తంగా వివిధ విభాగాల్లో పనిచేస్తున్న సిబ్బంది 93469 12011 నంబర్ ద్వారా అదనపు ఎస్పీ గారితో నేరుగా మాట్లాడారు.ప్రధాన సమస్యలు: సిబ్బంది ప్రధానంగా తమ సర్వీస్ పరమైన పోస్టింగ్స్, బదిలీలు, సెలవులు మరియు కుటుంబ ఆరోగ్య సమస్యలను అధికారుల దృష్టికి తీసుకువచ్చారు.
తక్షణ ఆదేశాలు:
ప్రతి సమస్యను లోతుగా విశ్లేషించిన అదనపు ఎస్పీ , వాటిని నిర్దేశిత గడువులోగా పరిష్కరించాలని సంబంధిత శాఖాధికారులను ఆదేశించారు.
”కానిస్టేబుల్ నుండి హోమ్ గార్డు వరకు ప్రతి ఒక్కరి సమస్యను పరిష్కరించడమే మా ప్రాధాన్యత. దూర ప్రాంతాల నుండి కార్యాలయాల చుట్టూ తిరగాల్సిన అవసరం లేకుండా, సిబ్బంది తమ సమస్యలను నేరుగా నాతో పంచుకోవచ్చు. ప్రతి సమస్యను అత్యంత గోప్యంగా ఉంచుతూ త్వరితగతిన పరిష్కారం చూపుతాం.”
— ఎల్.మోహన రావు, జిల్లా అదనపు ఎస్పీ.
ప్రతి శుక్రవారం ‘SP-SAMPARK’
ఈ కార్యక్రమం ప్రతి శుక్రవారం ఉదయం 11:00 గంటల నుండి మధ్యాహ్నం 12:00 గంటల వరకు నిరంతరాయంగా కొనసాగుతుంది. వచ్చే ప్రతి ఫిర్యాదును డిజిటల్ రిజిస్టర్లో నమోదు చేసి, అది పూర్తిగా పరిష్కారం అయ్యే వరకు పర్యవేక్షించడం జరుగుతుందని అధికారులు తెలిపారు.ఈ కార్యక్రమంలో ఆఫీస్ సూపరింటెండెంట్ గిరి మరియు ఇతర పోలీస్ కార్యాలయ సిబ్బంది పాల్గొన్నారు.
Tags: Anakapalli: Employee Welfare is Our Goal.
