పోలింగ్‌కు ముందు పులివెందులలో దుండగుల ఘాతుకం

పులివెందులముచ్చట్లు:

అర్ధరాత్రి పలు వాహనాలకు నిప్పు
15 వాహనాల్లో 8 పూర్తిగా దగ్ధం

ఎన్నికల పోలింగ్‌కు ముందు జరగడంతో స్థానికంగా కలకలం

ఘటనపై కేసు నమోదు చేసి దర్యాప్తు చేస్తున్న పోలీసులు

వాహనాలు వ్యాపారి మధుసూదన్ రెడ్డికి చెందినవిగా గుర్తింపు

పులివెందుల సమీపంలోని ఉలిమెల గ్రామానికి చెందిన మధుసూదన్ రెడ్డి వ్యాపార రీత్యా హైదరాబాద్‌లో స్థిరపడ్డారు. ఆయన పులివెందులలోని శిల్పారామం సమీపంలో ఉన్న తన వ్యవసాయ క్షేత్రంలో ఒక నివాసాన్ని నిర్మించుకున్నారు. అక్కడ 11 ద్విచక్ర వాహనాలు, 3 కార్లు, ఒక ట్రాక్టర్ ట్రాలీని నిలిపి ఉంచారు.

శనివారం అర్ధరాత్రి సమయంలో దుండగులు ఈ వాహనాలకు నిప్పుపెట్టారు. మంటలు వేగంగా వ్యాపించడాన్ని గమనించిన స్థానికులు వెంటనే అగ్నిమాపక సిబ్బందికి సమాచారం అందించారు. ఫైర్ సిబ్బంది ఘటనాస్థలానికి చేరుకుని మంటలను అదుపులోకి తెచ్చినప్పటికీ, అప్పటికే 8 వాహనాలు పూర్తిగా కాలి బూడిదయ్యాయి.

సమాచారం అందుకున్న పోలీసులు సంఘటనా స్థలానికి చేరుకుని దర్యాప్తు ప్రారంభించారు. పోలింగ్‌కు ముందు రోజు రాత్రి ఈ ఘటన జరగడంతో పట్టణంలో ఒక్కసారిగా కలకలం రేగింది. పోలీసులు ఈ ఘటనపై కేసు నమోదు చేసి నిందితుల కోసం గాలిస్తున్నారు.

Tags:Atrocity by miscreants in Pulivendula ahead of polling