సోమల ముచ్చట్లు:
సోమల మండలం కందూరు వంక వద్ద ఆరేళ్లుగా దెబ్బతిన్న ఆనకట్ట పునర్నిర్మాణానికి జిల్లా కలెక్టర్ నిశాంత్ కుమార్ గ్రీన్ సిగ్నల్ ఇచ్చారు. కార్పొరేట్ సామాజిక బాధ్యత (సీఎస్ఆర్) నిధుల నుంచి రూ.25 లక్షలు మంజూరు చేసి పనులను వెంటనే ప్రారంభించాలని సంబంధిత అధికారులను ఆదేశించారు. ఆధునిక సాంకేతిక పరిజ్ఞానంతో డైవర్షన్ ఆనకట్ట నిర్మాణం చేపట్టి వర్షాకాలానికి ముందే పూర్తి చేయాలని, నిర్మాణంలో నాణ్యతా ప్రమాణాలు తప్పనిసరిగా పాటించాలని సూచించారు.
ఆనకట్ట పునర్నిర్మాణం పూర్తయితే రాయకుట్టు పెద్ద చెరువు, బాపనకుంట, జలవాలకుంట, గొల్లవానికుంట, పుల్లివానికుంట సహా ఐదు చెరువులకు నీటి సరఫరా పునరుద్ధరించబడుతుంది. దీంతో మొత్తం 148.95 ఎకరాల ఆయకట్టుకు సాగునీరు అందుబాటులోకి వచ్చి రైతుల సాగునీటి కష్టాలు తీరనున్నాయి. ఉపాధి హామీ పథకం ద్వారా ఇప్పటికే నిర్మించిన కాల్వలకు ఈ ఆనకట్టను అనుసంధానం చేయనున్నట్లు కలెక్టర్ తెలిపారు.
ఏళ్లుగా పరిష్కారం కోసం ఎదురుచూస్తున్న ఈ సమస్యకు శాశ్వత పరిష్కారం లభించనుండటంతో స్థానిక రైతులు హర్షం వ్యక్తం చేస్తున్నారు. ఆనకట్ట నిర్మాణం పూర్తయిన తర్వాత సాగునీటి సరఫరా మెరుగుపడి పంటల సాగు విస్తీర్ణం పెరగడంతో పాటు రైతుల ఆదాయం కూడా పెరుగుతుందని అధికారులు ఆశాభావం వ్యక్తం చేస్తున్నారు.
Tags: Reconstruction of Kanduru Vanka check dam using Rs 25 lakh in CSR funds.
