తిరుపతి ముచ్చట్లు:
- రోడ్డు భద్రతా నియమాలపై విద్యార్థులకు సమగ్ర అవగాహన
- హెల్మెట్ వినియోగం, ట్రాఫిక్ సిగ్నల్స్, జీబ్రా క్రాసింగ్ ప్రాముఖ్యతపై వివరాలు
- మహిళల భద్రత, ఆత్మరక్షణపై ప్రత్యేక అవగాహన
- బాధ్యతాయుతమైన రహదారి వినియోగంతో ప్రమాదాలను నివారించాలని పోలీసుల సూచన
తిరుపతి జిల్లా ఎస్పీ ఎల్. సుబ్బరాయుడు, ఆదేశాల మేరకు రోడ్డు భద్రతపై ప్రజల్లో, ముఖ్యంగా యువతలో అవగాహన పెంపొందించే కార్యక్రమాల్లో భాగంగా (07-07-2026) తిరుపతి నగరంలోని గేట్ డిగ్రీ కళాశాల, భావానీనగర్లో ట్రాఫిక్ అవగాహన కార్యక్రమం నిర్వహించారు.
ఈ కార్యక్రమంలో తిరుపతి ట్రాఫిక్ పోలీస్ స్టేషన్ ఇన్స్పెక్టర్ ఎ. సంజీవ కుమార్ విద్యార్థులను ఉద్దేశించి ప్రసంగిస్తూ, రోడ్డు ప్రమాదాల నివారణలో ప్రతి ఒక్కరూ ట్రాఫిక్ నిబంధనలు పాటించడం అత్యంత కీలకమని తెలిపారు.
కార్యక్రమంలో హెల్మెట్ ధరించడం యొక్క ఆవశ్యకత, ట్రాఫిక్ సిగ్నల్స్ను తప్పనిసరిగా పాటించడం, జీబ్రా క్రాసింగ్ను సరైన విధంగా వినియోగించడం, రహదారులపై బాధ్యతాయుతంగా వ్యవహరించడం, ట్రాఫిక్ నిర్వహణలో ప్రజల సహకారం వంటి అంశాలపై విద్యార్థులకు సమగ్ర అవగాహన కల్పించారు.
అదేవిధంగా, మహిళల భద్రత, ఆత్మరక్షణ పద్ధతులు, అత్యవసర పరిస్థితుల్లో తీసుకోవాల్సిన జాగ్రత్తలు గురించి కూడా విద్యార్థినులకు అవగాహన కల్పించి, ఆత్మవిశ్వాసంతో ముందుకు సాగాలని సూచించారు.
ఈ సందర్భంగా జిల్లా ఎస్పీ ఎల్. సుబ్బరాయుడు సందేశం ఇస్తూ యువతలో ట్రాఫిక్ నియమాలపై అవగాహన పెంపొందించడం ద్వారా రోడ్డు ప్రమాదాలను గణనీయంగా తగ్గించవచ్చని తెలిపారు. ప్రతి వాహనదారుడు హెల్మెట్ ధరించడం, ట్రాఫిక్ నిబంధనలు పాటించడం తమ బాధ్యతగా భావించాలని, ప్రజలందరూ రోడ్డు భద్రతకు సహకరించాలని పిలుపునిచ్చారు.అత్యవసర పరిస్థితుల్లో వెంటనే 112కు సమాచారం అందించాలని తిరుపతి జిల్లా పోలీస్ శాఖ ప్రజలకు విజ్ఞప్తి చేసారు.
Tags:Traffic awareness program for GATE Degree College students
