జిల్లా పోలీసుల వినూత్న చొరవ
మదనపల్లి ముచ్చట్లు:
సమాజంలో మహిళల రక్షణే ధ్యేయంగా అన్నమయ్య జిల్లా పోలీసులు సరికొత్త అడుగులు వేస్తున్నారు. జిల్లా ఎస్పీ ధీరజ్ కునుబిల్లి ఆదేశాల మేరకు “మీ భద్రత – మా బాధ్యత” అనే ప్రత్యేక థీమ్తో జిల్లా వ్యాప్తంగా పట్టణాలు, గ్రామీణ ప్రాంతాలలో మహిళల భద్రతపై విస్తృత అవగాహన కార్యక్రమాలను బుధవారం ఘనంగా నిర్వహించారు. స్థానిక పోలీస్ స్టేషన్ అధికారులు, సిబ్బంది ఇతర మండల శాఖల అధికారులతో సమన్వయం చేసుకుంటూ ఏర్పాటు చేసిన ఈ సదస్సులకు మహిళల నుంచి విశేష స్పందన లభించింది. విభిన్న గ్రామాల నుంచి సుమారు 300 మందికి పైగా మహిళలు ఉత్సాహంగా తరలివచ్చి ఈ కార్యక్రమంలో భాగస్వామ్యులయ్యారు.
ప్రస్తుత సమాజంలో మహిళలు, పిల్లలపై జరుగుతున్న రకరకాల నేరాలు, చైన్ స్నాచింగ్ దొంగతనాలు, రోజురోజుకూ పెరిగిపోతున్న సైబర్ మోసాల పట్ల మహిళలు ఎలా అప్రమత్తంగా ఉండాలో పోలీస్ అధికారులు ఈ సందర్భంగా ప్రాక్టికల్గా వివరించారు. కేవలం బాహ్య రక్షణే కాకుండా, మారుతున్న జీవనశైలి వల్ల పెరుగుతున్న కుటుంబ వివాదాలు, దాంపత్య సమస్యల కారణంగా పచ్చని సంసారాలు ముక్కలవుతున్న తీరును ఉదాహరణలతో ప్రస్తావిస్తూ కౌన్సిలింగ్ ఇచ్చారు. ప్రతి ఒక్కరూ కుటుంబ విలువలను కాపాడుకోవాలని, గృహ సమస్యలను పంతాలకు పోకుండా పరస్పర అవగాహనతో, సామరస్యంగా పరిష్కరించుకోవాలని హితవు పలికారు. అలాగే పిల్లలకు చిన్నతనం నుంచే మంచి అలవాట్లను నేర్పిస్తూ, నాణ్యమైన విద్యను అందించడం ద్వారా వారి భవిష్యత్తును బంగారు బాటగా మార్చుకోవచ్చని సూచించారు.
అత్యవసర పరిస్థితుల్లో గానీ, ఏదైనా ఆపద ఎదురైనప్పుడు గానీ మహిళలు ఏమాత్రం అధైర్యపడకుండా తక్షణ పోలీస్ సహాయం కోసం స్థానిక పోలీస్ స్టేషన్, లేదా ‘డయల్ 112’ నెంబర్కు కాల్ చేయాలని అధికారులు అవగాహన కల్పించారు. దీంతో పాటు మహిళల రక్షణ కోసం ప్రభుత్వం ప్రత్యేకంగా రూపకల్పన చేసిన ‘శక్తి యాప్’ విశిష్టతలను, దాన్ని మొబైల్స్లో ఎలా ఉపయోగించాలో, దాని ద్వారా లభించే తక్షణ సేవల గురించి మహిళలకు క్షుణ్ణంగా వివరించారు. మహిళల భద్రతకు అన్నమయ్య జిల్లా పోలీస్ యంత్రాంగం ఎల్లప్పుడూ అండగా ఉంటుందని ఈ సందర్భంగా అధికారులు భరోసా ఇచ్చారు.
Tags: ‘Your Safety – Our Responsibility’ Awareness Seminars on Women’s Safety
