-విద్వేషాలకు దూరంగా.. విజ్ఞానానికి దగ్గరగా ఉండాలి.
-పుంగనూరు అర్బన్ సీఐ బి. సుబ్బరాయుడు సూచన..
పుంగనూరు ముచ్చట్లు:
నేటి ఆధునిక కాలంలో సోషల్ మీడియా అనేది ఒక శక్తివంతమైన సాధనమని, దానిని కేవలం జ్ఞాన సముపార్జనకు, సమాజ శ్రేయస్సుకు మాత్రమే వినియోగించాలని పుంగనూరు అర్బన్ సీఐ సుబ్బరాయుడు ప్రజలకు విజ్ఞప్తి చేశారు. మంగళవారం ఆయన స్థానిక పోలీస్ స్టేషన్లో విలేకరులతో మాట్లాడుతూ.. సామాజిక మాధ్యమాల వినియోగంలో పాటించాల్సిన జాగ్రత్తలపై పలు కీలక సూచనలు చేశారు.
విద్వేషాలు వద్దు.. విజ్ఞానమే ముద్దు:
సోషల్ మీడియాను కేవలం మంచి పనుల కోసం, కొత్త విషయాలను నేర్చుకోవడానికి మాత్రమే వేదికగా చేసుకోవాలని ఆయన కోరారు. “మీరు పెట్టే ప్రతి పోస్టు ఇతరుల మనోభావాలను దెబ్బతీయకుండా ఉండాలి. కుల, మత, రాజకీయ విద్వేషాలను రెచ్చగొట్టేలా పోస్టులు పెడితే చట్టపరమైన చర్యలు తప్పవు” అని హెచ్చరించారు. ఫేస్బుక్, వాట్సాప్, ఇన్స్టాగ్రామ్ వంటి వేదికల్లో బాధ్యతాయుతంగా ప్రవర్తించాలని సూచించారు.
పిల్లల వెబ్ యాక్టివిటీపై నిఘా ఉండాలి:
ముఖ్యంగా తల్లిదండ్రులు తమ పిల్లల పట్ల అప్రమత్తంగా ఉండాలని సీఐ స్పష్టం చేశారు. “పిల్లలు మొబైల్లో ఏం చూస్తున్నారు? ఎవరితో మాట్లాడుతున్నారు? వారు ఏ వెబ్సైట్లు సందర్శిస్తున్నారు? అన్న విషయాలను ఎప్పటికప్పుడు గమనించాలి. వారి వెబ్ యాక్టివిటీని ట్రాక్ చేయడం ద్వారా వారిని పెడదారి పట్టకుండా కాపాడుకోవచ్చు” అని తెలిపారు. సైబర్ నేరగాళ్ల బారిన పడకుండా ఉండాలంటే పిల్లలకు డిజిటల్ భద్రతపై అవగాహన కల్పించాలని ఆయన సూచించారు.
అప్రమత్తతే రక్షణ:
అపరిచిత వ్యక్తులతో స్నేహం చేయవద్దని, వ్యక్తిగత వివరాలను సామాజిక మాధ్యమాల్లో పంచుకోవద్దని కోరారు. ఏవైనా అనుమానాస్పద లింకులు వస్తే వాటిని క్లిక్ చేయవద్దని, సైబర్ ఇబ్బందులు ఎదురైతే తక్షణమే పోలీసులను సంప్రదించాలని సీఐ సుబ్బరాయుడు ఈ సందర్భంగా ప్రజలకు విజ్ఞప్తి చేశారు.
Tags: ‘Caution’ on Social Media… Keep an Eye on Your Children’s Activities!
