అమెరికా ముచ్చట్లు:
అమెరికా, ఇజ్రాయెల్ సంయుక్తంగా జరిపిన దాడులతో ఇరాన్ అణు, క్షిపణి సామర్థ్యం పూర్తిగా దెబ్బతిన్నదని ఇజ్రాయెల్ ప్రధాని బెంజమిన్ నెతన్యాహు సంచలన ప్రకటన చేశారు. దాదాపు మూడు వారాల పాటు సాగిన వైమానిక దాడుల తర్వాత, ఇరాన్కు ఇకపై యురేనియం శుద్ధి చేసే శక్తి గానీ, బాలిస్టిక్ క్షిపణులను తయారుచేసే సామర్థ్యం గానీ లేదని ఆయన గురువారం స్పష్టం చేశారు.
విదేశీ మీడియాతో మాట్లాడుతూ, “మేము విజయం సాధిస్తున్నాం, ఇరాన్ నాశనమవుతోంది” అని నెతన్యాహు అన్నారు. అణ్వాయుధ విడిభాగాలు, క్షిపణులను తయారుచేసే కర్మాగారాలను ధ్వంసం చేస్తున్నామని తెలిపారు. అయితే, ఇరాన్ యురేనియం శుద్ధి సామర్థ్యాన్ని కోల్పోయిందన్న తన వాదనకు ఆయన ఎలాంటి ఆధారాలు చూపలేదు. తన ఆరోగ్యంపై వస్తున్న వదంతులను ప్రస్తావిస్తూ “అందరికంటే ముందుగా, నేను బతికే ఉన్నాను” అని ఆయన చమత్కరించారు.
అమెరికా అధ్యక్షుడు డొనాల్డ్ ట్రంప్ ఎప్పుడూ అమెరికా ప్రయోజనాలకే ప్రాధాన్యమిస్తారని, ఈ విషయంలో ఇరు దేశాల ప్రయోజనాలు ఒకటేనని అన్నారు. “అధ్యక్షుడు ట్రంప్తో, అమెరికా నిఘా వర్గాలతో సమన్వయం చేసుకుని లక్ష్యాలను వేగంగా ఛేదిస్తున్నాం” అని తెలిపారు. ప్రపంచం ట్రంప్కు ఎంతో రుణపడి ఉందని ప్రశంసించారు.
ట్రంప్ అభ్యర్థన మేరకు ఇరాన్లోని ప్రధాన గ్యాస్ క్షేత్రాలపై భవిష్యత్తులో దాడులు చేయబోమని నెతన్యాహు హామీ ఇచ్చారు. అయితే, సౌత్ పార్స్ గ్యాస్ క్షేత్రంపై ఇజ్రాయెల్ ఒంటరిగానే దాడి చేసిందని, ఇప్పుడు ట్రంప్ కోరడంతో ఆపుతున్నామని వివరించారు. ఈ పోరు ఇప్పటివరకు వైమానిక దాడులకే పరిమితమైనప్పటికీ, భూతల దాడుల (గ్రౌండ్ ఆపరేషన్స్)కు కూడా అవకాశం ఉందని నెతన్యాహు వెల్లడించారు. ఇరాన్ నాయకత్వంలో తీవ్ర ఉద్రిక్తతలు ఉన్నాయని, ప్రస్తుతం అక్కడ ఎవరు అధికారంలో ఉన్నారో కూడా స్పష్టత లేదని వ్యాఖ్యానించారు.
Tags: Iran’s Nuclear and Missile Capabilities Eliminated: Israeli PM Netanyahu
